法国前锋基利安麦巴比喺世界盃决赛上演帽子戏法，技惊四座，比佢年轻8岁嘅细佬伊当麦巴比亦走出球员生涯重要一步，首次为巴黎圣日耳门(PSG)一队上阵踢热身赛，两兄弟下届世界盃有望拍住上。

巴黎圣日耳门日前同法乙球队巴黎FC踢热身赛，畀冇份参加世界盃嘅球员保持状态，结果PSG小胜2比1。全场最瞩目一幕系下半场开波，伊当麦巴比後备上阵，呢位未满16岁嘅小将上年6月同PSG签约後，终於迎来一队处子战。

伊当麦巴比今季曾经踢5场青年欧联赛事，表现出色，近期获提升上一队操练。佢完成PSG处子战後，不忘喺社交网话心情非常激动。

有别於司职前锋嘅哥哥，伊当麦巴比属於中场球员，而且惯用左脚，擅长传送组织攻势，将来正好可以助攻畀基利安麦巴比入波。