法国球星基利安麦巴比行衰运，巴黎圣日耳门(PSG)喺周四(2日)法甲虽然作客3比1赢蒙彼利埃，但基利安麦巴比今场2度12码宴客，冇波入之余仲要受伤离场，就连佢喺法甲射手榜嘅榜首位置，都被英格兰新星巴洛根抢走埋！

PSG连续2场联赛失分後，今仗一开波就不断施压，只系10分钟就博到12码，基利安麦巴比操刀虽然被扑出，但因蒙彼利埃球员违规获判重射，点知基利安麦巴比第2次主射又被扑到，呢位法国前锋喺21分钟更疑似膝部受伤提早退下火线。

PSG踢到55分钟由法比安彭拿打开纪录，美斯72分钟拉开到2比0，蒙彼利埃完场前1分钟破蛋，但补时阶段PSG再由小将萨尔艾美利入波，赢3比1完场。PSG领队加迪亚赛後表示：「麦巴比伤势睇落唔系好严重，同佢倾过之後，应该唔使太担心。」

基利安麦巴比今场食白果，今季联赛入波仍然系13球，不过兰斯主场4比2赢罗连安特一仗，主队前锋巴洛根连中三元後，以14球登上射手榜第1位，呢位阿仙奴借将只系21岁，依家竟然力压基利安麦巴比排射手榜第1位，前途无限。