法甲班霸巴黎圣日耳门(PSG)向来系转会土豪，天价收购尼马、基利安麦巴比等巨星深入民心，不过自教练加迪亚同总监甘波斯上场後，似乎决心作出改变，畀更多机会青训球员上阵，近期人气急升嘅沙利艾美利等5位新星，就有望喺巴黎上位。

受到伤病问题困扰，16岁嘅沙利艾美利今季火速上位，近4场赛事更2度取得入球，17岁中坚比舒亚保近期亦频频上阵，加上17岁前锋侯斯尼、18岁西班牙中场加尔比都喺今季首次为一队上阵，加上基利安麦巴比嘅16岁细佬伊当麦巴比备受期待，佢哋被视为PSG青训梯队黄金一代。

总监甘波斯表示：「我哋会畀更多时间年轻球员，加迪亚明白呢个系球会嘅计划，我哋要腾出空间畀佢哋上位，防止佢哋畀其他欧洲豪门挖角。」PSG青训一向人才辈出，好似拉比奥特、京士利高文、尼干古、穆沙戴亚比等等，但佢哋都因为想寻求上阵机会而选择转会。

PSG教练加迪亚就表示，唔介意对沙利艾美利等小将委以重任：「球队需要竞争，如果一个16岁半球员证明自己比其他人更值得上阵，佢就一定会上阵！」