爱华顿上场爆冷击败阿仙奴後，周二(14日)凌晨「默西赛德郡打吡」吞利物浦2蛋，门将比克福特失嘅第1球更犯严重错误，佢面对穆罕默德沙拿同加普嘅反击，慌失失下竟然走错位去「无人地带」，睇住沙拿轻松射入空门。

利物浦开纪录一球来自快速反击，当时达云纽尼斯左路高速快放，沙拿同加普就喺近柱同远柱等接应，不过比克福特离奇选择唔理近柱嘅沙拿，移步去远柱加普嗰边，沙拿面对空门当然冇甩拖，但比克福特就被人闹爆。

利物浦名将加历查表示：「门将应该受到质疑，佢想去边？佢去咗个无人地带！」曼联名将加利尼维利亦同意：「比克福特真系好差，我完全唔明佢谂紧乜，佢送个空门畀沙拿射入。」3年前曾撞断华基尔云迪积克脚嘅比克福特，向来系晏菲路「不受欢迎人物」，完场前佢更同安德鲁罗拔臣爆冲突，後者挑衅性向住佢大笑羞辱，比克福特今场乜面都冇晒。