阿仙奴喺英超主场1比3不敌曼城，所入一球嚟自布卡约沙卡嘅12码，呢个入波赛後亦成为热话，除咗因为判罚具争议性，布卡约沙卡同艾达臣摩拉斯嘅心理战亦成焦点，结果呢位英格兰翼锋顺利射入，确定阿仙奴12码刽子手嘅地位。

阿仙奴冬季转会窗签入意大利中场佐真奴後，唔少球迷都想知呢位「12码专家」会唔会负责操刀，咁啱今仗汤马士柏迪受伤，令佐真奴得以首度为阿仙奴正选上，不过当「兵工厂」得到12码後，仍然由今季一直操刀嘅布卡约沙卡处理，证明地位不变。

曼城门将艾达臣摩拉斯喺主罚期间大玩心理战，不断指住自己右下角叫布卡约沙卡「射呢度」，估唔到布卡约沙卡竟然「好听话」咁照射，搞到捉错路嘅艾达臣摩拉斯面目无光。布卡约沙卡自欧国盃决赛12码宴客後，喺英超4次主射100%成功。