车路士周日(26日)喺英超作客0比2输畀热刺，对上15场赛事成绩改写成2胜4和9负，完场後有球迷喺请愿网站《Change》发起联署，要求班主保利炒朴达鱿鱼，短短半日已有近3万人签名。至於朴达就唔认输，借阿仙奴领队阿迪达过桥想保住帅位，但网民似乎唔多受落。

车路士球迷喺《Change》嘅签名运动话：「保利同一众管理层，呢次联署系畀你哋，请你哋解雇朴达。车路士球迷已经灰心，球队用咗好多钱，有个好强大嘅阵容，但有一个地方仲可以改变，就系领队。为咗车路士嘅未来，请解雇朴达！」

朴达赛後表示佢需要更多时间：「我哋喺赛前睇咗阿仙奴同佢哋套《All or Nothing》，阿迪达上任头2年系灾难，球迷想佢走，佢亦几乎被炒，但依家你睇佢哋已经有啲唔同，足球就系咁样。」不过，网民就批评朴达借阿迪达过桥，指阿迪达季中接手，冇使过1毫子就喺半年内帮阿仙奴捧英足盃冠军，而朴达1月用咗3亿镑买人，但系依家连波都赢唔到。