阿仙奴今季喺英超同曼城争逐冠军，兵源系佢哋争霸最大隐忧，不过近日就有好消息传出，加比尔捷西斯预计会喺3月中复出，而伊美路维同1月加盟嘅积及基奥柯周二(28日)亦喺U21赛事披甲，有望喺嚟紧嘅密集赛程候命。

3月底国际赛期前，阿仙奴会喺不足3星期内连踢6场，好在近日接连收到喜讯，自上年9月受伤後只踢过1分钟比赛嘅伊美路维，周二喺U21联赛对车路士复出踢45分钟，表现颇为活跃，而波兰中坚积及基奥柯1月加盟後，亦首次披起阿仙奴波衫比赛，预料2人会喺下星期展开嘅欧霸盃16强赛事上阵。

更加重要嘅消息系，《Football London》报道巴西前锋加比尔捷西斯去年底做手术後，已经接近完全康复，依家目标系3月19日对水晶宫嘅联赛复出，次之会借国际赛期空档提升状态，准备季尾全力冲刺。