车路士喺冬季转会窗大事扩军，用1亿欧元收购嘅乌克兰翼锋梅迪历备受期待，不过呢位天才快翼加盟後，踢咗6场比赛仍然系0入波+0助攻，唔少球迷已经准备晒经典「007」改图，当佢7场0入波0助攻嗰阵拎出嚟「招呼」佢！不过梅迪历近期连上阵机会都欠奉，有传佢根本唔系领队朴达要求签嘅球员。

22岁嘅梅迪历被萨克达称为麦巴比、云尼斯奥斯之後，世界第3大翼锋，但佢加盟车路士後完全冇料到，近3仗更加连正选都冇埋，上仗车路士1比0小胜列斯联，梅迪历直情连後备上阵机会都冇，唔少车迷都话至少可以推迟「007」嘅出现。

前阿仙奴球星麦臣日前喺《天空体育》提出质疑：「一个身价1亿欧元嘅球员坐喺後备席，证明佢唔系领队想要嘅球员，如果朴达有向保利(班主)要求签梅迪历，一定会喺比赛用佢。试问签一个唔会比原有球员更好嘅人，有乜意思？」