英超「1哥」阿仙奴再献热血反胜！周日(5日)凌晨英超大战，阿仙奴主场开波9.11秒闪电失波，但最後喺落後2球劣势下，补时7分钟神奇绝杀赢3比2，拎到争标极为重要嘅3分。绝杀英雄赖斯尼尔逊今季极少上阵，但全季85分钟落场竟然有3入波同2助攻，场均17分钟贡献1个入波，惊人效率冠绝全英超！

作客嘅般尼茅夫今场有惊喜，开波第1个攻势就由菲腊标宁射入，时间系9.11秒，系英超史上第2快出现嘅入波，仅次於2019年修咸顿前锋沙恩朗嘅纪录(7.69秒)。阿仙奴失守後发动狂攻，控球率超过8成，但久攻不下之余，57分钟更喺角球走甩马高斯辛尼斯输到0比2。

阿仙奴随即展开绝地大反击，62分钟汤马士柏迪龙门口撞射先追1粒，69分钟换入23岁翼锋赖斯尼尔逊更加成为关键，佢入场1分钟即传中畀宾韦特怒射追成2比2平手，去到「补上补」嘅97分钟，阿仙奴角球被解围至禁区顶，赖斯尼尔逊控定後狂抽入网，协助阿仙奴绝杀赢3比2。

阿仙奴青训出身嘅赖斯尼尔逊，近年经常受伤患困扰影响发展，但今季就成为球队奇兵，今仗只系佢第3次喺联赛上阵，但合共85分钟嘅比赛竟然贡献3入波同2助攻，包括季初对森林一仗後备入替交出2射1传，喺李安度杜沙特今仗伤出下，赖斯尼尔逊嚟紧有望肩负更重要嘅任务。

阿仙奴依家继续领先次席曼城5分，领队阿迪达赛後表示：「我哋已经4连胜，喺英超连赢4场系好艰难嘅事，尤其1周3赛更加系难上加难。我哋以唔同嘅方式获胜，今场胜仗会令到球员更自信，阿仙奴今场面对好多不利因素，球员仍然搵到方法赢波系非常正面嘅讯号。」