曼联日前作客利物浦惨输0比7，队长般奴费南迪斯喺比赛期间情绪失控，比赛尾段更公然推开旁证，但球证当时未有作出处分。英国球证协会主席表明，般奴费南迪斯嘅行为应该要被罚停赛至少5场，不过消息指英格兰足总已有决定，就系唔追究呢次「攻击球证」行为。

事发喺「双红会」81分钟，当时般费喺边线推开霸住个波嘅阿历山大阿诺特，旁证阿当纽恩叫佢保持冷静，满肚牢骚嘅般费之後竟一掌推开阿当纽恩。负责提供球证训练、支援嘅英国球证协会主席卡斯迪表示：「同球证身体接触系好严重嘅事，绝对应该严肃处理，英格兰足总应该清楚传达保护球证嘅讯息，般奴费南迪斯嘅行为不能接受，佢应该接受停赛至少5场。」

不过据英国传媒报道，由於主球证麦利当时目睹事件，但并冇喺赛後报告入面提到呢件事，所以英格兰足总唔会作出追究。