曼联想签入法兰基迪庄人所共知，近日有消息传出，红魔将於今夏再度向巴塞出价，希望佢重投坦哈格麾下，不过球员唔系咁谂，英国传媒报道，该位荷兰中场再度表明唔会离开巴塞，希望长期留效。

曼联今季重建球队，中场人选相继签入基斯甸艾历臣同卡斯米路，但其实坦哈格最想要嘅系法兰基迪庄，去年夏天一度接近完成交易，但最终因为球员唔想离队而作罢。今季即将完结，曼联再度萌生签入该25岁中场念头，但球员无意离开。

英国《镜报》报道，虽然巴塞去年一度有意出售迪庄，以缓解球会财政压力，但迪庄凭表现赢得球会信任，今季上阵33场，巴塞现居西甲榜首，夺冠在望，报道指巴塞内部庆幸当日未有出售迪庄，否则球队可能冇咁好成绩。

迪庄近日重申唔会离队，希望长期效力巴塞：「效力巴塞系我梦想，我希望帮巴塞捧盃，我喺呢度好安静，好舒服，喺沙维领军下，我会继续进步。」