近日卷入贿赂球证官司嘅巴塞隆拿，球场外再遇到重大打击，西甲周一(13日)宣布撤销新星加维嘅一队注册资格，虽然呢位18岁中场今季仍然可以以青年军球员资格上阵，但由於新合约被判无效，加维喺今个夏天随时可以以自由身转会。

加维上年9月同巴塞隆拿续约至2026年，但球会嘅薪酬空间唔足够容纳加维新合约人工，巴塞提出上诉後，西班牙商业法庭最初下令西甲「预先接受」加维注册，巴塞就需要喺指定限期前向西甲提出诉讼。不过商业法庭周一宣布撤销去年嘅判令，因为巴塞未有如期提出诉讼，违反法庭协议。

依照目前情况，加维嘅新合约会被视为无效，将会回复季前青年军注册身份，球衣号码亦会由6号变番30号，但更令球迷担心嘅系，如果巴塞搵唔到方法同加维再注册，呢位新星喺夏天将回复自由身，传闻拜仁慕尼黑、车路士同利物浦都对佢虎视眈眈。