曼联中场卡斯米路上仗对修咸顿被罚红牌，判决引起极大争议，不过据英国《曼彻斯特晚报》报道，曼联认为上诉成功机会唔大，已决定唔会提出上诉，卡斯米路将会即时喺本土赛事停赛4场，不过周五(14日)凌晨欧霸盃对贝迪斯仍然可以上阵。

卡斯米路对修咸顿一仗上半场飞剧踢中对手，球证原本出示黄牌，但经VAR覆核後改判红牌，亦系卡斯米路登陆英超後第2张红牌，所以要停赛4场。消息指曼联检讨後，认为打甩红牌机会微，所以唔会提出上诉，佢将喺英足盃8强主场对富咸，以及作客纽卡素、主场对宾福特、主场对爱华顿3场英超坐波监。

曼联中坚华拉尼表示：「卡斯米路对曼联非常重要，佢为球队带嚟平衡，不过球队有强大阵容，每个位置都有出色球员做替补，我哋会有合适球员为之後比赛做好准备。」喺皇家马德里从未被直接出示红牌嘅卡斯米路，今次服刑後喺曼联将会累积停赛8场，包括上次红牌停赛3场，以及之前因累积5面黄牌停赛1场。