C朗拿度喺沙特阿拉伯嘅冠军梦再受打击，佢效力嘅艾纳斯周二(9日)凌晨主场只能打和艾卡赫利1比1，同榜首伊蒂哈德差距又被拉开至5分。完场後有客队职员「唔识相」，就去搵心情极差嘅C朗扮熟Selfie，结果被C朗愤怒推开。

艾纳斯今场4分钟就被法比奥马田斯攻陷，虽然17分钟就由艾华路干沙利斯追平，不过C朗脚风仍然麻麻，亦有入波被判诈胡，最终只能够踢成1比1平手。艾纳斯近4场联赛第3度失分，C朗喺呢4场亦第3度食白果，心情当然唔靓，点知完场後艾卡赫利一名职员，第一时间冲去搭住C朗膊头，并且举起手机谂住同C朗Selfie，C朗见到即刻将佢推开，而且嬲爆示意对方唔好触碰到佢，场面火爆。

虽然呢位艾卡赫利职员自讨苦吃，不过为佢哋入波嘅葡萄牙前锋法比奥马田斯，赛後就获C朗赠送波衫作为纪念。