韦斯咸将於周四(8日)凌晨欧协联决赛出战费伦天拿，今仗可能成为「锤仔帮」中场迪格兰赖斯嘅告别战，除咗盛传阿仙奴计划今夏收购呢位24岁英格兰国脚之外，德甲霸班拜仁慕尼黑近日亦加入争夺，誓要截兵工厂胡。

根据《天空体育》爆料，拜仁慕尼黑教练杜曹担任车路士领队期间，已经非常欣赏迪格兰赖斯，佢今夏组军工作，第一件事就向会方推荐呢位防守中场。据悉杜曹已私下致电迪格兰赖斯，向佢介绍拜仁未来发展大计，认为赖斯加盟拜仁，可以取得更大事业成就。

韦斯咸曾经向迪格兰赖斯开出20万镑(约195万港元)周薪续约，但已被佢拒绝，所以会方已为出售迪格兰赖斯做准备，包括要求1亿镑(约9.76亿港元)转会费，当今球坛愿意为1位球员支付呢笔巨额金钱嘅球会并唔多，潜在买家不外乎阿仙奴、车路士、曼联、拜仁慕尼黑。

至於最终花落谁家，除咗转会费之外，亦要睇迪格兰赖斯意愿，佢比较倾向转投阿仙奴，杜曹够唔够牙力说服佢改变主意，大家拭目以待。