陷入服食禁药丑闻嘅保罗普巴，早前提供B样本经过分析後，仍然「肥佬」未能过关，将面临被罚停赛2至4年，所属球会祖云达斯已经对呢位30岁法国国脚失去耐性，向佢发出停薪通知，冻结现有合约薪酬条款，佢只能够取得意甲每月2,000欧元(约16,600港元)「最低工资」。

保罗普巴上年夏天离开曼联之後，以自由身加盟祖云达斯，签约4年，获得1,050万欧元(约8,700万港元)年薪，但佢因为受伤，至今仅为祖记上阵12场，自上月被检出服食禁药後，一直停赛，几时复出仍然系未知之数。

祖云达斯当然唔想白白浪费薪酬支出，根据规定，会方有权只向停赛球员发放「最低工资」每月2,000欧元，祖记已经将相关决定通知普巴。据悉一旦普巴被罚停赛6个月以上，祖云达斯更加有权同佢解约。