狼队领队加利奥尼尔确认，前锋黄喜灿已经同意续约至2028年夏天，但呢位27岁南韩国脚将於下月离队出战亚洲盃，可能缺阵6星期，加利奥尼尔透露有意签入前锋，填补呢段「真空期」。

黄喜灿今季表现大勇，踢16场英超入8球及2次助攻，会方早前同佢达成续约协议，绑实呢位猛将，主帅加利奥尼尔话：「我哋好满意黄喜灿嘅表现，佢好勤力，为球队射入唔少重要入波，好开心佢可以长期留队。」

不过，黄喜灿将於下月为南韩出战喺卡塔尔主办嘅亚洲盃，呢项赛事将於下月12日至明年2月10日举行，如果南韩打入决赛，加上黄喜灿参赛前备战，以及赛事结束後需要休息，好可能有6星期无法为狼队上阵。

加上中场保巴卡查奥尔、後衞艾洛利下月亦要离队踢非国盃，加利奥尼尔表示有意下月签入「替工」，目标包括捷克球队柏辛域陀尼亚前锋杜罗辛美，呢位20岁新星身高1米92，步大力雄应该适合狼队踢法。