曼联领队兰历克上任後密谋大改革，据报队长哈利马古尼竟然都系被清洗目标，呢位8,000万镑中坚最近2场联赛都沦为後备，喺兰历克心目中嘅重要性明显唔大。曼联名宿史谭近日亦公开批评哈利马古尼，话佢表现「衰过布朗」。

英国《每日星报》报道，兰历克审阅曼联阵容後，认为哈利马古尼、云比沙卡同劳基梳尔3位後防，水平都唔符合要求，将会被曼联清洗，当中以哈利马古尼「上榜」最令人惊讶，呢位英格兰国脚2019年加盟後，第1季38场联赛全部正选，上季亦只系喺受伤或休息先至缺阵，但最近佢连续2仗喺健康情况下沦为後备，睇住华拉尼同域陀连迪路夫合组中坚拍挡。

事实上，哈利马古尼今季状态麻麻，季初唔少失球都同佢有关，曼联传奇中坚史谭日前表示，哈利马古尼实力连佢当年拍挡布朗都不如：「曼联用好多钱买马古尼，老实讲佢踢李斯特城嗰阵几好，不过我觉得布朗嘅速度比佢更高，1对1嘅防守亦更灵活，效力曼联嘅话呢两项元素好重要。」