巴塞隆拿作客皇家马德里嘅西甲国家打吡即将开打，呢场大战唔止对两间西班牙豪门非常重要，对冬季转会窗加盟巴塞隆拿嘅奥巴美扬而言，亦别具意义，背後原因，原来同呢位加蓬射手嘅西班牙外公有关。

奥巴美扬虽然出生於法国，但佢嘅妈妈同外公都系嚟自西班牙，其中外公就住喺距离首都马德里外100公里嘅小镇El Barraco。奥巴美扬忆述自己细细个嗰阵，曾经向外公许下诺言，话有朝一日要为皇家马德里上阵，最终加蓬射手虽然成功登陆西甲，但就加盟咗皇马嘅死敌巴塞隆拿。

现实与儿时的承诺有所出入，不过奥巴美扬就认为外公依然会感到自豪：「外公系马德里体育会嘅球迷，但细细个嗰阵，我就成日同佢讲话会踢另一队波。无论外公依家喺边度睇紧，我相信佢会对我穿起红蓝战衣感到开心。」

加盟巴塞後，一直保持出色嘅入球效率，至今联赛已经为球队攻入5球，亦因此赢得主帅沙维嘅信任，稳坐正印前锋嘅位置。呢场西班牙国家打吡，将会系奥巴美扬进一步证明自己实力嘅好机会。