随住欧霸盃同欧协联4强完结，今届欧洲3大盃赛决赛球队全部诞生，有趣嘅系英超、西甲嘅垄断局面被打破，6支决赛队伍分别嚟自6个联赛，「百花齐放」嘅局势令球迷更有新鲜感。

今届6支决赛球队分别系英超嘅利物浦(欧联)、西甲嘅皇家马德里(欧联)、德甲嘅法兰克福(欧霸)、苏超嘅格拉斯哥流浪(欧霸)、意甲嘅罗马(欧协联)同荷甲嘅飞燕诺(欧协联)，传统5大联赛中只有法甲缺席，马赛喺欧协联4强正正系畀飞燕诺淘汰。

4强嗰阵原本有机会出现2场「内战」，包括欧联「全英决赛」利物浦同曼城、以及欧霸盃法兰克福对RB莱比锡嘅德甲对决，但曼城同RB莱比锡双双出局。今次系苏超自08年後再有球会杀入欧洲赛决赛，格拉斯哥流浪08年欧霸盃决赛不敌辛尼特屈居亚军；荷甲对上一次有球会踢欧洲赛决赛，就系阿积士喺2017年欧霸决赛输畀曼联。