多蒙特前锋艾宁夏兰特将转投曼城，「蜜蜂兵团」亦早有准备，据报呢支德甲劲旅已倾掂签入前锋新星艾迪耶美。呢位德国新晋国脚同艾宁夏兰特一样，喺萨尔斯堡上位後加盟，佢嘅经理人更证实签约多蒙特前，曾拒绝曼联嘅聘约。

据报多蒙特同艾迪耶美几个月前已达成口头协议，随住艾宁夏兰特离队已成定局，多蒙特亦即刻启动救亡计划，以3,800万欧元签入呢位20岁前锋，双方将会签约5年。艾迪耶美经理人沙洛文证实：「我哋多蒙特已经非常接近达成协议，而且5年合约入面唔会设置违约金条款。」

艾迪耶美今季喺奥地利联赛踢27场入19球，而且更跻身德国大国脚行列，英超劲旅曼联对佢亦有兴趣，尤其下季转任曼联顾问嘅兰历克，正正系将佢发掘嘅人，不过沙洛文表示：「兰历克？冇错曼联系想加入争夺，不过艾迪耶美已经心属多蒙特。」