继曼城即将签入艾宁夏兰特後，另一炙手可热嘅欧洲神锋亦接近转会。法国球星基利安麦巴比周一(9日)被影到喺马德里现身，盛传系同皇家马德里就转会进行最後谈判，据报转会死结嘅肖像权问题，皇马答应让步後已扫除最後难关，消息指转会有望喺2星期内官宣。

皇马对麦巴比一直虎视眈眈，上年夏天出价1.8亿欧元收购被巴黎圣日耳门(PSG)拒绝後，麦巴比今夏将回复自由身，呢位23岁神锋对加盟皇马同样情有独锺。西班牙电台COPE报道，麦巴比周一突然现身马德里，同行仲有PSG队友阿舒拉夫兄弟，3人喺餐厅用膳嗰阵行踪曝光，而餐厅位置距离巴拿贝球场只有7分钟路程！阿舒拉夫系皇马青训出身，对马德里相当熟悉。

巧合嘅系，PSG会长艾卡理化依家同样身处马德里，佢近日喺当地出席一个欧洲足球峰会，几位转会主角齐齐喺马德里，无疑系谈判嘅最佳机会。法国媒体《Foot Mercato》报道，麦巴比同皇马已就谈判死结嘅肖像权问题达成共识，皇马答应再次破例，将向来50:50嘅肖像权改为倾向麦巴比嘅60:40，皇马过去只曾1次打破呢个规则，就系收购C朗拿度嗰阵。

多间媒体都指出，麦巴比今夏转投皇马已经水到渠成，签字费、薪酬同合约年期早就倾好，不过麦巴比要求等法甲球季结束後先正式宣布，PSG今季只剩最後2场联赛，预料5月22日法甲煞科战对梅斯後会作出官宣。