曼城喺社区盾输畀利物浦，挪威前锋艾宁夏兰特表现一般，临完场前更有门前6码射空门失机画面，令球迷担心佢适应唔到曼城踢法，不过领队哥迪奥拿赛後就派定心丸，话从来冇担心过艾宁夏兰特嘅入球能力，认为今仗可以令佢睇清英超现实，系一件好事。

艾宁夏兰特今场受到华基尔云迪积克看管，有2次射门机会都未能把握，补时6分钟菲尔科顿射门被扑出，佢门前2码补射竟然抽中门楣弹出。哥迪奥拿赛後表示：「夏兰特好强壮，下次佢会射入。夏兰特不断战斗，亦有好多走位，畀佢睇清一个新国家、新联赛嘅现实系好事，虽然今场冇入波，但佢有超强入球能力，唔需要担心。」

曼城上季大部份时间踢无锋阵，哥迪奥拿就否认为夏兰特改变踢法：「夏兰特喺美国之旅入波嗰阵，个个都话佢好抢镜，佢今场都有好多机会，球队并冇重大改变。」曼城今季比其他球队迟开操，今仗之前只系踢过2场热身赛，哥迪奥拿表明之後会再加大训练量。