今晚英超尾场爆发伦敦打吡，车路士主场硬撼热刺。车仔仍处於重建阶段，新兵史达宁又脚风唔顺，必定先求稳阵，热刺造访克星亦会小心翼翼，加上近年碰头例少交收，不妨向2.5球嘅入球细埋手。(Now 621及611周日晚11时30分直播)

车仔除咗安达斯基斯坦臣同鲁迪格已离队外，马高斯阿朗素亦有传快将他投，急急签入高列巴尼及古古列拿，防线仍需时间磨合。至於签入史达宁，系为咗解决前线欠缺数胡人物问题，但这名英格兰国脚一向表现飘忽，首轮作客爱华顿虽然极具威胁，但亦浪费咗唔少良机，最终佢都系食白果，而车仔只凭佐真奴操刀12码建功小胜1比0，主帅杜曹赛後更指众将仍需提升体能，问题不少。

另一边厢，热刺喺首轮主场反胜修咸顿4比1，头威头势，不过要留意，两大王牌哈利卡尼及孙兴民都冇士哥，4个入波有3球系後衞取得。睇番双方近5次正式赛事交手，热刺全部输晒，包括干地上季季中接手，连盃赛3斗车仔都败阵，似乎有啲格食格，以干地咁保守嘅风格，今仗唔敢冒进。加上近3次碰头全开2球或以下，2.5球嘅细盘乃不二之选。