车路士收购前锋计划如火如荼，球会日前同加逢前锋奥巴美扬达成个人协议後，已正式向巴塞隆拿开价1,500万镑转会费，加上西班牙左闸马高斯阿朗素交换，不过消息指巴塞隆拿并未同意，因为佢哋要求纯现金交易，叫价约2,100万镑。

车路士领队杜曹同奥巴美扬曾经喺多蒙特合作，球会已锁定呢位33岁前锋为收购目标，双方已就个人条件倾掂数，不过车路士希望用马高斯阿朗素代替部份转会费做法，就被巴塞隆拿否决，因为巴塞需要现金收入，先可以为祖利斯古迪进行注册，预计车路士会改变方案再出手。

巴塞隆拿教练沙维周五(19日)喺记者会，仍然表示想奥巴美扬留队：「奥巴美扬喺我计划之内，对佢嘅表现亦好满意，当然去到转会窗完结前仲有好多事情可能发生，但我锺意奥巴美扬，佢可以帮助到球队。」