周三(7日)凌晨欧联H组两强交锋，法甲王者巴黎圣日耳门(PSG)凭基利安麦巴比上半场梅开二度，主场以2比1击败意甲球队祖云达斯。

麦巴比职业生涯第5次喺欧联开赛头5分钟入波，仅比纪录保持者兼队友美斯少1次，呢位法国国脚年仅23岁，要打破美斯嘅「欧联快枪手」纪录，指日可待。

开波仅5分钟，尼马笠传入禁区，基利安麦巴比第一时间凌空抽射入网，祖云达斯亦有前锋米利克头槌攻门，非常有威胁，但PSG门将基安卢基当拿隆马神勇救出。

祖记扳平唔到之余，更於22分钟再失1球，阿舒拉夫横传，基利安麦巴比快脚劲射入网，成为欧联史上单场最快射入祖云达斯2球嘅球员，旧纪录系C朗2013年10月创下，当时佢开赛29分钟为皇马攻入祖记2球。

换边後冇耐，祖云达斯由後备上阵嘅中场韦斯顿麦坚尼顶入，追至1比2。不过，PSG仍然占有较多攻势，包括基利安麦巴比射门贴柱出界，尼马主射罚球仅高出，最终PSG维持赢2比1，旗开得胜。

被网民称为「麦总」嘅基利安麦巴比赛後当选今场最佳球员，佢话：「我哋下半场表现冇上半场咁好，我知我哋仲有弱点，领先2比0後，我有所失误，我一生之中错失好多入波机会，呢种事情经常会发生，要努力改善，欧联唔易踢，如果易踢，我哋一早赢咗冠军。」

同组另1场，宾菲加由拉法施华、阿历斯基莫度各建一功，主场以2比0击败海法马卡比。