巴塞隆拿今个夏天大展拳脚，另一方面亦积极「瘦身」，虽然欧洲主要联赛嘅转会窗已经关闭，不过巴塞隆拿仍然继续减磅，据报波斯尼亚中场比真历已接纳阿联酋球会FC沙迦斟介，今个星期就会飞去中东签约。

为促成比真历转会，巴塞隆拿同意畀呢位32岁中场免费转会，阿联酋球会FC沙迦就向佢开出3年合约，比真历最初都有犹豫，但佢留喺巴塞亦唔会有上阵机会，《每日体育报》指比真历最终决定接纳呢份薪酬「难以拒绝」嘅合约。

比真历上季被外借去土耳其比锡达斯，虽然巴塞隆拿今次冇转会费进帐，但就可以清走超过20万欧元周薪嘅合约，对球会财政有极大帮助。