曼城喺打吡战6比3大炒曼联，艾宁夏兰特同菲尔科顿各自连中三元，根据球场传统习惯，连中三元嘅球员赛後可以将个波拎番屋企留念，不过今场曼城2将都「戴帽」，究竟边个拎先至合理？曼城中场根度简就主动出手，化解呢个少少尴尬嘅场面。

同一队有2个球员喺同一场波入3球，今次系英超史上第3次出现，之前有阿仙奴(2003年)嘅皮利斯、宾纳特，以及李斯特城(2019年)嘅艾约斯佩雷斯、占美华迪。完场後夏兰特第1时间「霸」住个波，点知根度简突然「偷波」，将个波抛畀菲尔科顿，两人亦若无其事继续向观众鼓掌致谢，呢个时候原来根度简已经搵咗另一个後备波，畀佢哋两个各拎1粒，皆大欢喜。

艾宁夏兰特同菲尔科顿赛後受访，夏兰特就搞笑表示：「一人一个？唔得！将个波切开，一人一半。」事後两人再喺社交网Po出一人一波合照，为呢场精彩大胜画上完美句号。