美斯今季法甲上阵11场入6球，已经等於上季联赛总入球数字，状态更胜从前，但呢位35岁前锋似乎有退意，透露将於今届世界盃後决定前途，似乎暗示唔排除离开欧洲球坛。

美斯接受阿根廷传媒访问时话：「我好幸运，35岁仲可以踢世界盃，我身体及精神状态都非常好，世界盃结束之後，我会对职业生涯发展作出抉择，当然一切要取决於我个人身体状况，我喜欢同最强嘅人比赛，但唔同年龄阶段，就有唔同考虑，我嘅家庭系关键，老婆同小朋友对我非常重要。」

美斯将於明年夏天同PSG约满，虽然曾盛传巴塞有意邀请佢回巢，但呢支西甲劲旅现时锋线人才济济，未必可以容纳美斯，有「球星养老院」之称嘅美职更加大机会成为佢下一站落脚地，已经多次传出由碧咸做班主嘅国际迈亚密计划签入美斯。