曼联作客1比1逼和车路士，葡萄牙球星C朗拿度虽然被处罚式弃用，不过佢亦冇怀恨在心，今仗开波前特别喺社交网贴出同队友庆祝嘅相片，留言「Let's Go！」为曼联打气，似乎已经知道自己「斗」唔过坦哈格嘅权威，准备再次投入球队。

曼联今场喺补时先执番1分，如果输波嘅话，弃用C朗嘅决定势必被大造文章，但坦哈格赛後表示就算今场输波，都唔会後悔处分C朗嘅决定：「卡斯米路入波非常重要，为曼联拎到应得嘅1分，呢个入波同嗰件事(处分C朗)冇关，我嘅决定系要建立正确嘅文化同价值观，长远嚟讲对球队系更加重要，会带领我哋走向正确嘅道路。」