德国国家队门将纽亚周四(3日)喺社交网公开震撼消息，佢证实早前患上皮肤癌，并且已经进行3次手术，据报纽亚依家已经康复，近期系因为膊头伤患而缺阵，不过近日亦开始操练，有望赶及世界盃前复出。

36岁嘅纽亚喺社交网宣布，佢同德国女子网球手姬芭一齐投资研发一种防晒霜，纽亚表示：「我哋都曾经患过皮肤上嘅疾病，姬芭系有由太阳引起嘅皮肤色素紊乱，我嘅个案系面部患皮肤癌，并且已经做过3次手术，所以我哋特别注重防晒同皮肤保护。」

德国《图片报》报道，纽亚得知患癌後仍坚持比赛，上年11月对比勒费尔德嘅联赛，佢被影到面上贴上胶布，当时佢喺啱啱做完手术。消息指纽亚目前已经康复，呢位曾113次为德国国家队把关嘅门将，预计将会再为德国出战世界盃决赛周。