曼联喺欧霸盃作客1比0小胜皇家苏斯达，比数唔足够佢哋抢走首名，领队坦哈格赛後埋怨前线人手不足，今仗比赛最後12分钟佢更使出终极武器，用哈利马古尼入替入球功臣加拿祖後，竟然系搵佢拍住C朗拿度做双箭头，令一众球迷睇到O晒嘴！

曼联要赢2球先可以首名出线，尾段换入哈利马古尼後，呢位英格兰国脚企喺最前同C朗一齐进攻，不过曼联并冇太多放长传机会，搞到哈利马古尼一度走去左翼位搵食，坦哈格赛後解释：「我哋争取入波就要制造更多可能性，哈利马古尼同C朗都系头槌好好嘅球员，我哋想直接攻击对手禁区，有几球都做得好成功。」

虽然最後入唔到波，但哈利马古尼踢12分钟前锋就令球迷大开眼戒，前威尔斯国脚沙维治喺直播表示：「我从来冇谂过，会有幸睇到马古尼同C朗喺曼联做双箭头！」