曼联领队坦格哈希望明年1月冬季转会市场重开後，增兵提升球队实力，但由於会方唔愿意大开水喉，如果佢想收购新球员，就必须先出售现有球员套现，英国传媒指左右二闸劳基梳尔、云比沙卡都系被出售目标。

曼联早於今夏转会市场已经想出售云比沙卡，呢位24岁後衞今季仅上阵1次，成为球队一大冗员，会方希望明年1月再搵买家，盛传韦斯咸、水晶宫都有意接收云比沙卡，但出价一定唔会高。

云比沙卡2019年夏天以4,500万镑转会费由水晶宫加盟曼联，估计佢现时只值2,000万镑。

另外，劳基梳尔将於明夏约满，曼联考虑到佢经常受伤，无意同佢续约，据悉红魔鬼管理层正在同爱华顿方面倾交易事宜。爱华顿主帅林柏特希望签入1位助攻力强左闸，所以睇中劳基梳尔。不过，呢位27岁英格兰国脚希望同曼联续约，会方想甩手并唔容易。

如果曼联可以顺利出售2人，坦格哈就会喺冬季签入前锋，取代有可能离队嘅C朗。