周日(13日)凌晨英超大战，「1哥」阿仙奴作客2比0击败狼队，喺进入世界盃休战期前，将榜首优势增加至5分，锁定成为英超「圣诞冠军」。睇番英超近11季坐榜首过圣诞嘅球队，有8队最後顺利捧盃，阿仙奴今季可能有运行！

趁住曼城主场输波，阿仙奴今场强阵争胜，不过上半场受制於狼队嘅密集防守，两队半场冇任何中龙射门下闷和0比0。换边後阿仙奴发力，55分钟马田奥迪加特接应法比奥韦拉传中近门射入，呢位挪威中场75分钟再喺禁区乱军中建功，梅开二度带领阿仙奴赢2比0。

阿仙奴14场联赛拎到12胜，5分领先次席曼城，英超踢埋今轮就会让路世界盃，要到拆礼物日先至复赛，意味阿仙奴喺英超史上第3次成为「圣诞冠军」。数据显示，对上10次圣诞冠军有7次赢到最後，包括曼联(12/13)、车路士(14/15)、李斯特城(15/16)、车路士(16/17)、曼城(17/18)、利物浦(19/20)、曼城(21/22)；3次失落冠军嘅都系利物浦。

阿仙奴领队阿迪达赛後绝口不提争标机会，只系想继续带领球队进步：「我哋嘅排名同赢波次数已经超出大家预期，但我更加关注球队内部嘅发展，专注喺每场比赛嘅进步。我哋只要做好每一日嘅工作，就会有更大机会进步同达成目标。」