世界盃决赛周即将展开，斥巨资举办赛事嘅卡塔尔，近日出现大批各国球迷喺度载歌载舞咁庆祝，High爆迎接世界盃到临，不过唔少网民睇完呢啲热爆片段後，都质疑佢哋「有古怪」，疑似系卡塔尔用钱请嚟假扮嘅球迷，志在为世界盃造势。

卡塔尔着名短片社交应用程式Qatar Living，近期有唔少球迷喺卡塔尔街头庆祝片段，包括英格兰、巴西、阿根廷、葡萄牙、喀麦隆等等，但系网民就提出唔少疑点，包括「点解咁多球迷早成个星期飞去卡塔尔」、「全部聚会都好有组织」、「球迷入面一个女性都冇」，甚至有人表示「见到有球迷喺另一条片着另一队国家队波衫」。

网民质疑卡塔尔系请当地嘅外来劳工扮球迷，提早炒热世界盃气氛。其实卡塔尔唔系第1次被指「买球迷」，早喺2014年一场国际沙滩排球赛事，现场就出现爆棚盛况，但有入场球迷承认自己系受雇出席，当时参赛嘅法国球员路兰臣表示：「个场面真系好墟冚，但我宁愿喺个空场比赛......」