阿根廷超新星加拿祖最终无缘世盃名单，即使最新公布嘅补选都冇份，佢可以安心做观众，不过好球员仍然值得表扬，刚公布嘅曼联11月最佳球员，加拿祖当之无愧当选，算系安慰奖。

11月赛事，加拿祖表现极之抢镜，喺早前欧霸盃作客皇家苏斯达，呢位18岁小将射入全场唯一入球赢1比0，之後喺英联盃对阿士东维拉，佢又交出助攻为球队赢4比2，喺休战前嘅英超作客富咸，佢喺补时3分钟攻入英超处子球，协助曼联2比1绝杀攞3分。

喺曼联11月最佳球员票选中，卡斯米路同迪基亚都系有力竞争者，结果加拿祖获69%大幅支持当选。

另边厢，加拿祖落选阿根廷後，好多网友为佢发声，批评阿根廷唔识货，其中有一则留言「加拿祖落选，因为佢系西班牙人」获加拿祖点赞，事关加拿祖喺马德里出世，可以选择代表西班牙，有网友认为，阿根廷唔要佢，西班牙安历基随时可以出手抢人，召佢入西班牙大军。