世盃揭幕战厄瓜多尔2比0击败东道主卡塔尔，曾经喺英超搵食嘅安拿华伦西亚梅开二度，成为揭幕战嘅最佳男主角。呢位「国宝级」前锋包办厄瓜多尔最近5个世盃入球，赛後顺理成章获选为今场MVP。安拿华伦西亚系厄瓜多尔王牌，但场外私生活是非多多，之前更卷入赡养费官司，曾经喺一场世盃外赛事，出现诈伤逃避警方追捕嘅夸张画面！

安拿华伦西亚喺上半场连入2球，以33岁16日之龄成为年纪最大嘅「世盃第1球」球员，厄瓜多尔上次踢世盃系8年前，当年佢哋喺分组赛以1胜1和1负成绩出局，该届所入嘅3球全部都系来自安拿华伦西亚，意味佢包办晒国家队近5个世盃入球，呢位前韦斯咸、爱华顿前锋赛後表示：「由抽签开始，我已梦想喺呢场比赛上阵兼赢波，今仗可以话系梦想成真。」

依家效力费伦巴治嘅安拿华伦西亚，系厄瓜多尔史上入波最多球员，属「国宝级」球星，但私生活就颇为混乱。喺2016年10月曾因拖欠前妻赡养费被警方通缉，但当时佢有场18年世盃外围赛对智利要应付，结果佢喺队友协助下「偷入」球场，踢到完场前更疑似诈伤，吸住氧气瞓担架直上救护车，一度出现12名警察喺场边狂追担架床嘅罕见场面。

安拿华伦西亚今场喺77分钟因伤被换离场，不过厄瓜多尔领队艾法路赛後透露：「入球对安拿华伦西亚意义重大，今场我哋有4、5个球员被踢伤，不过全部都唔算严重，安拿华伦西亚会喺下仗对荷兰上阵，呢一点唔需要怀疑。」