卢卡古今季在国际米兰养伤多时，早前复出不久再受伤，今次系带伤入选比利时世盃名单，但系比利时周五(18日)抵达卡塔尔至今都未能跟随球队操练，消息指卢卡古将会错过分组赛头两场大战。

卢卡古今季由车路士外借重投国米，一直受伤患困扰，10月底喺欧联对柏辛域陀尼亚复出後备上阵，并射入1球，以为佢强势回归，点知转头又受伤，据称系腿筋受伤，虽然入选世盃名单，但无法随大队操练。

「渣古」为比利时上阵102场入68球，系球队史上首席射手，比利时冇咗佢攻力势必大打折扣，早前热身赛就以1比2输畀埃及，消息指佢将缺席分组赛头两场，亦即对加拿大及摩洛哥两场赛事，至於能否在分组赛最後一场对克罗地亚嘅大战复出，仲要睇佢康复情况。