英格兰周一(21日)喺世盃第1击大战伊朗，普遍睇好「三狮兵团」可以旗开得胜，不过佢哋亦要小心，事关伊朗门将比兰云特天生神力，试过用手掟波直飞超过61米，系健力士世界纪录保持者，哈利马古尼等後防真系要小心比兰云特发动嘅快速反击！

现年30岁嘅比兰云特，喺2016年10月代为伊朗对南韩嘅18世盃外围赛，禁区内用手直接将个波抛去前场心脏地带，数据显示途程长达61.26米(66.7码)，创下用手扑波最远世界纪录。比兰云特经常喺接波後，都会有一段小助跑，用右手将个波用尽力掟畀前锋反击，成为伊朗一大利器。

前英格兰国脚瑟顿表示：「修夫基嘅踢法系要球员压前控制比赛，两只闸都会杀上去前面传中，如果比兰云特接到其中一个传中球，佢就可以即刻策动反击，掟畀喺中场线开始跑动嘅前锋，随时可以突破英格兰防线。」