今晚世盃B组早场威尔斯火并伊朗。威尔斯上仗尾段逼和美国，展现斗心，遇上同组最弱嘅伊朗，正系赢波良机。伊朗上仗畀英格兰大炒，近7次世盃对欧洲球队，录得1和6负劣绩，捧威尔斯主胜为妙。

（Now 618及616周五晚6时直播）

威尔斯相隔64年再出战决赛周，首仗上半场球员患得患失，但换边後明显有改善，始终佢哋多位球员踢紧英超，质素有保证。由於威尔斯分组赛煞科仲要斗「英伦大佬」英格兰，想争出线今仗必定要全取3分，唔可以留手。

伊朗上仗对英格兰原本守得唔错，但正选门将比兰云特20分钟伤出後，防线立即崩溃，呢位门神因出现脑震荡及鼻骨骨折，今仗无法披甲，入替佢嘅侯斯恩尼对住英格兰劲失6粒，信心全失，若然佢担正防线危危乎，加上伊朗喺世盃面对欧洲球队被对手食住，点有能力打破宿命。