将於周一(28日)晚举行嘅世界盃H组南韩对加纳，成为一场师徒对决，南韩球星孙兴民2009年加盟汉堡青年军，当时球队教练正系现任加纳主帅艾度。呢位47岁教头可以话系「孙仔」欧洲之旅成名路嘅启蒙老师，亦非常了解对方，相信今场有方法冻结呢位「高徒」。

虽然艾度系前加纳国脚，但其实喺德国出世，球员及教波大部分生涯都喺德国度过，佢效力汉堡至挂靴後，就加入球队U19青军做教练，其後碰上由南韩远道而来嘅孙兴民，当时「孙仔」只系17岁。

艾度话：「我好期待同老朋友孙兴民见面，我哋喺汉堡U19青年军已相识，我非常尊重南韩，对方实力强横，今次必定系一场硬仗。」艾度球员时代司职翼锋同进攻中场，相信「孙仔」当年喺佢身上学到唔少进攻技术，为日後打出名堂奠下基础。

艾度除咗曾经担任汉堡U19青年军教练之外，亦做过多蒙特助教，上年9月成为加纳国家队助教，今年2月坐正做领队。虽然佢大赛教波经验尚浅，但上仗率领加纳仅以2比3不敌葡萄牙，已经赢尽口碑，今场随时又有惊喜。