英格兰将於周三(30日)凌晨世界盃B组最後1轮分组赛对威尔斯，「三狮兵团」打和都可以出线，英格兰国家队史上入波最多嘅球员朗尼献计，建议领队修夫基收起队长哈利卡尼，避免呢位射手伤势恶化，影响球队争标。

哈利卡尼右脚足踝有伤，上仗带伤上阵对美国，表现低迷，可见伤患问题严重影响呢位热刺球星发挥，所以朗尼认为既然英格兰出线机会高唱入云，冇必要再冒险畀哈利卡尼上阵：「英格兰下场对威尔斯，需要作出人脚变动，首先系收起哈利卡尼，我见佢上场踢得非常辛苦，佢系球队非常重要嘅主力，必须好好保护佢，帮助佢重拾状态。」呢位前曼联队长建议可以用哥林威尔逊代替哈利卡尼嘅正选位置。

不过，网民认为朗尼要求修夫基收起哈利卡尼，其实有私心，因为卡尼已为英军累积入51球，只差2球就可以追平朗尼嘅国家队入波纪录，佢梗系唔想咁快畀呢位後辈超越啦。

另外，现时担任美职华盛顿联队教练嘅朗尼认为菲尔科顿亦应该踢正选，因为呢位22岁曼城新星有创造力及入球能力，可以提升英格兰攻力，以免再出现上仗对美国嘅闷战局面。