世盃B组尾轮另一场生死战，伊朗火并美国。伊朗上仗大踢争气波，保持出线机会，相反美国今场必须赢波先可晋级，不过佢哋守强攻弱，近5仗全开2球或以下，今仗会先求稳阵，2.5球嘅细盘更可取。（Now 619及617周三凌晨3时直播）

伊朗上仗围住威尔斯嚟攻，但阿斯蒙等前锋屡失良机，直到末段「红龙」有门将轩尼斯被逐，伊朗打多1人下，喺补时凭捷舒米及列沙伊安各建一功先赢至2比0，攻力认真麻麻。伊朗依家以3分排次席，领先美国及威尔斯1分及2分，如果威尔斯赢唔到英格兰，佢哋只要打和即出线，若果威尔斯爆冷赢波，得失球差至少变-1，而依家得失球为-2嘅伊朗，和波就会出局。

美国喺头两轮全部打和，今仗一定赢波先可出线，虽然「花旗国」活力十足，但头两轮只入1粒，阵中前锋如基斯甸普列锡、添莫菲韦亚及夏治胡礼勤做逼抢，却忘带射门鞋，其中上仗面对英格兰占尽上风，仍未能攻破对手大门，最终互交白卷，攻力欠锐。连同各项赛事，美国近5仗未赢过兼只入2粒，仅失4球，明显守强攻弱，今仗必定稳中求胜，面对近5仗4次开2球或以下嘅伊朗，唔慌多波入，宁捧细盘。