英格兰喺今届世盃表现出色，8强输畀法国一战亦有理想发挥，大部份时间都喺法国之上，出局虽败犹荣。赛後英格兰球迷、球评家都呼吁领队修夫基继续留任，认为佢有能力带领年轻嘅「三狮兵团」喺2年後欧国盃再创佳绩。

喺修夫基带领之後，英格兰连续3届大赛杀入最少8强，上届世盃拎到第4名、上年欧国盃就夺得亚军，今届亦嚟到8强先输畀法国，表现已经重返精英行列。今届系英格兰第7次喺世盃8强止步，成为世盃史上8强出局次数最多球队。

英格兰喺今年欧国联「降班」後，修夫基一度受到球迷质疑，不过今届世盃就令佢重获球迷信任，大批网民呼吁佢继续领军，转任评述嘅名将加利尼维利、伊恩胡礼、坚尼亦指修夫基系带队最佳人选。修夫基赛後表示：「每次大赛之後，我都会同足总坐低总结同反思，确保每个人都作出正确决定。」据报英格兰足总亦好满意修夫基嘅工作，打算向佢开出新合约。

事实上，英格兰大部份球员仍非常年轻，布卡约沙卡(21岁)、菲尔科顿(22岁)、迪格兰赖斯(23岁)、祖迪比宁咸(19岁)等都未进入黄金年龄，依家已经成为国家队主力兼有高水平表现，英格兰前景仍然系一片光明。