法国对阿根廷算系重量级戏码，连日嚟都有唔少国际球星表达意见，希望美斯能够一圆梦想成功封王嘅谂法，令呢场决赛更多聚焦喺个人身上，两队一路都踢得相当谨慎，嚟到决赛难免更加保守，预计反击效率将成胜负关键，个人较睇好阿根廷。

两大球王难冻结

法国能否成功冻结美斯，特别系可唔可以减少佢用波次数，切断输送来源先系重点。另外走动积极、作用全面嘅迪保罗都不得不防，超乎球迷预期嘅祖利安艾华利斯同安素费南迪斯亦成为奇兵，前者胜在远射同後上能力强，後者嘅走动同门前触觉都值得赞赏，对阿根廷嚟讲要防基利安麦巴比，亦不宜轻举妄动，特别系右路防区嘅布置要分外小心。

法国连日嚟受到伤病问题影响，上周五就有五位球员缺席操练，预计悉数不能上阵嘅可能性唔高，但病毒对体能状况有几大影响亦都系个疑问，而且球队少一日休息，复原程度可能较差。近仗法国防线已经多次作出变动，对整体运作有一定影响，而且中场防守力唔太理想，好多时要倚靠基沙文返到好深嘅位置去协防，呢个未必系最理想嘅安排，球队将会更倚靠反击嚟争取入波。