「红魔鬼」英超再上征途！重建计划有起色嘅曼联，联赛重开首仗迎战诺定咸森林，虽然名牌前锋C朗拿度已经离队，不过曼联表现反而更团结同更有纪律性，一众球员喺奥脱福主场球迷呐喊助威下，往往能够踢出超水准，今场大胜可期，曼联让球半、两球，上盘博得过。(Now 621周三凌晨4时直播)

曼联自坦哈格上任後，一直严格整顿球员场内场外纪律，大牌如C朗拿度亦唔会例外，呢位葡萄牙巨星上月宣布解约，但佢今季一直表现低迷，亦系是非根源，离队对战力影响唔大，士气更会有所增长。何况拉舒福特、安东尼马迪尔同新人加拿祖等前锋都有突出表现，强大活力令曼联重现久违嘅生气。

曼联依家嘅逼抢踢法愈趋成熟，就算中坚华拉尼同利辛度马天尼斯踢完世盃决赛後未及复出，喺奥脱福出击亦能靠整体防守，将森林嘅威胁力降到最低。曼联喺各项赛事主场5连胜，当中有4场系赢多过1球，经过上周英联盃淘汰般尼做热身後，今场可望有更好发挥。

森林依家深陷降班漩涡，联赛休战前虽然有些少起色，但抢分都系靠主场之利，今季作客战绩惨不忍睹，近5仗联赛作客1和4负，当中包括0比6不敌曼城、0比4输畀李斯特城同0比5不敌阿仙奴，面对顶级球队完全不堪一击。曼联对上一次英超对森林系1999年，当时曼联狂胜8比1，今仗大胜冇难度，上盘咪错过！