荷甲劲旅阿积士宣布，同後衞戴利白兰特达成协议，双方提早半年解约，呢位32岁老将可以自由身离队，盛传佢可能重返曼联，跟坦哈格搵食。

戴利白兰特嘅合约原本将於今季结束後届满，但依家提前走人，阿积士会方发表声明称赞呢位荷兰国脚嘅贡献，行政总裁云达沙亦祝佢有更佳发展：「希望戴利白兰特可以搵到新球会，继续取得成功，我哋将会为佢举行1场告别赛。」

戴利白兰特属於阿积士青训球员，2014年转投曼联，4年後重返母会，一直效力至今，总共为阿积士上阵333次。戴利白兰特2019年被验出患有心肌炎，身体需要安装起搏器，但佢仍然坚持足球生涯，并喺今届世界盃16强对美国，射入1球。

虽然戴利白兰特未有透露新去向，但有传可能重返曼联，因为红魔鬼主帅坦哈格之前执教阿积士期间，重用戴利白兰特，唔排除会搵佢帮手，唔少网民亦呼吁红魔鬼签番呢位可以胜任中坚同左後衞嘅全能战士。