曼联英超又赢1场，以3比0击败诺定咸森林，今季以7,000万欧元转会费由皇马加盟嘅中场卡斯米路贡献1次助攻。有统计发现，呢位巴西国脚成「魔」之後，踢20场正式比赛，曼联取得15胜2和3负，胜出率高达75%，卡斯米路用数据说话，证明自己物有所值。

曼联今夏买唔到巴塞隆拿中场法兰基迪庄，情急之下焗住以7,000万欧元向皇马收购30岁嘅卡斯米路，由於佢年纪唔细，加上以往巴西球员踢曼联，都冇乜好结果，令红魔鬼被睇死又做水鱼。

无可否认，卡斯米路加盟曼联初期，表现未如理想，但之後愈战愈勇，包括10月英超作客车路士，战至补时入波，帮曼联逼和对手1比1，对於呢位一向甚少入波嘅防守中场而言，实在非常难得。

卡斯米路今场对森林，唔止有助攻，仲有104次触球、7次对抗胜出、5次铲波、3次解围、3次创造机会、2次拦截、2次射门，表现攻守兼备。

值得一提，曼联击败森林，自2017年12月之後，首次录得各项赛事主场6连胜，当中卡斯米路有5次踢正选，球队都保持不失球，有呢位森巴硬汉喺中场扫荡，红魔鬼防线冇後顾之忧。