美斯世盃夺冠後，现时仲喺家乡同家人度假过圣诞，原来佢同PSG已经达成协议，将於明年1月3日重返球会练波。

阿根廷传媒报道，根据同PSG协议，美斯将於明年1月3日结束假期，呢段时间将错过3场赛事，包括今晚法甲重开对斯特拉斯堡，以及下仗法甲作客朗斯，同埋法足盃64强对查多鲁，按照操练进度，美斯将於1月12日凌晨法甲复出，到时PSG将主场迎战昂热。

解决归队日期後，美斯同PSG嘅续约谈判亦提上日程，有报道指，美斯夺得世盃後心情大靓，同PSG嘅续约谈判亦进展顺利，据报PSG代表同美斯曾於多哈会面，消息指美斯即将接纳PSG开出嘅一年续约条件。