英超圣诞新年快车尾轮，打头阵嘅系宾福特主场迎战利物浦。「蜜蜂兵团」虽然前两轮录1胜1和，但王牌前锋艾云东尼受伤缺阵，球队攻力剧跌；「红军」世盃後联赛两战全胜，缔造英超4连胜，摆脱季初颓势全力追赶前4，肯定趁对方首席射手缺阵抢分，佢哋近4仗联赛全部半场领先，推介半场客胜。（Now 621周二凌晨1时30分直播）

渡边年2023年第一次同大家见面，先祝大家身体健康、波运亨通。宾福特同利物浦都系新年首度出击，当然想抢到3分打响头炮。两支球队喺快车档期成绩都唔错，宾福特上轮净胜韦斯咸两粒，如果唔系拆礼物日领先两球下，捉到鹿唔识脱角，畀热刺追和，随时同利物浦一样取得两连胜。

不过，宾福特上仗赢「锤仔帮」都付出好大代价，王牌前锋艾云东尼勇战受伤，要担架抬离场，今场多数缺阵。要知道呢名英格兰前锋对「蜜蜂兵团」几咁重要，宾福特今季联赛17战射入27球，艾云东尼一个已经入咗12粒，今场冇咗佢球队进攻肯定哑火。

利物浦成功演绎「好运紧要过好波」，上场斗李斯特城先失球下，凭对手两个乌龙波反胜2比1，联赛豪取4连胜。达云纽尼斯近排虽然脚风唔顺，但加普即将加盟，相信会令佢更加努力找寻入波，查实呢名乌拉圭前锋拚劲十足，只系欠咁啲运，只要破入球荒，相信士哥陆续有来。咪忘记「红军」仲有穆罕默德沙拿，早前就成为球队史上第二快达到入波及助攻「50+」嘅球员，唔使担心攻力问题，佢哋近4场联赛赢晒之余，全部半场领先，今场有望早早打开纪录，半场客胜玩得过。